Agjencia për Sigurimin e Cilësisë në Arsimin e Lartë (ASCAL), në përputhje me kuadrin ligjor në fuqi dhe standardet evropiane për sigurimin e cilësisë në arsimin e lartë, fton profesionistë të fushave akademike dhe të kërkimit shkencor të aplikojnë për t’u përfshirë si Ekspertë të Vlerësimit të Jashtëm. Roli i ekspertëve është thelbësor në garantimin e një procesi vlerësimi objektiv, transparent dhe të bazuar në evidenca, i cili kontribuon drejtpërdrejt në përmirësimin e cilësisë së institucioneve të arsimit të lartë dhe programeve të studimit në Shqipëri.

Ekspertët e vlerësimit të jashtëm janë pjesë e komisioneve profesionale që analizojnë dhe vlerësojnë funksionimin institucional, rezultatet akademike, kapacitetet kërkimore, si si dhe përputhshmërinë e programeve të studimit me standardet kombëtare dhe ndërkombëtare të cilësisë. Angazhimi i tyre përfshin shqyrtimin e dokumentacionit, pjesëmarrjen në vizitat në terren, komunikimin me aktorët institucionalë dhe përgatitjen e raporteve të vlerësimit.

Për të garantuar profesionalizëm dhe integritet në proces, ASCAL synon të përzgjedhë ekspertë me kualifikime të larta akademike, eksperiencë të konsoliduar në fusha përkatëse dhe njohuri të mjaftueshme mbi standardet e sigurimit të cilësisë. Kjo thirrje synon krijimin e një baze më të gjerë ekspertësh vendas dhe ndërkombëtarë, të aftë të kontribuojnë në zhvillimin e mëtejshëm të sistemit të arsimit të lartë në vend.

Kriteret bazë për përzgjedhjen e ekspertëve sipas VKM 109/2017 janë:

• Eksperti duhet të ketë së paku gradë shkencore “Doktor” ose titull akademik, sipas kërkesave të fushës.
• Përvojë pune të dokumentuar të mëparshme në vlerësimin institucional dhe/ose në fushën e programeve të studimit, në kuadër të sigurimit të jashtëm të cilësisë në Shqipëri dhe/ose jashtë vendit.

Kritere të dëshirueshme:

• Të këtë të paktën 5 vite përvojë akademike, dhe të jetë i/e punësuar si personel akademik me kohë të plotë në një institucion të arsimit të lartë, ose institut kërkimor-shkencor.
• Përvojë në sigurimin e cilësisë në institucionet e arsimit të lartë ku ka qenë/është i angazhuar;
• Njohuri mbi proceset e vlerësimit në kuadër të akreditimit institucional si dhe programeve të studimit, në Shqipëri dhe/ose jashtë saj;
• Preferohet eksperiencë ndërkombëtare në mësimdhënie, kërkim shkencor dhe sigurimin e cilësisë, të fituar nëpërmjet kualifikimeve universitare dhe pasuniversitare jashtë Shqipërisë;
• Njohuri të tregut të punës dhe perspektivave të punës në fushën përkatëse;
• Të ketë njohuri akademike të gjuhës angleze dhe të jetë në gjendje të shkruajë materiale akademike në gjuhën angleze.